87 r

Hie hebt sich an Master Marteins Hundtfeltz kunst dem got genädig seÿ mit dem kurtzen swert zu° champf In harnasch aus vier hu°ten

Merck das ist die erst hu°t | Nÿm das swert in paid hend vnd schut das krefftigcleich | vnd kum in den hangenden ort zw dem rechten ör | vnd stich ÿm zw dem gesicht | vnd setz ÿm an in das gesicht oder wo das ist | Wert ers so zuck | vnd gee durch mit dem stich | vnd setz jm an als vor | vñ wenn du ÿm hast angesetzt | So schlach dein swert vnder dein rechtzs üchsen | vnd dring ÿn also von dir hÿn -

Ein anders stuck

Stich jm zu° als vor | wert ers mit dem voderñ ort fur seiner lincken hant | vnd setzt ab | So val ÿm mit der lincken hant in sein swert peÿ dem ort | vnd weis ÿm den stich ab | vnd stich ÿm mit der rechten hant krefftigklich zw den hoden | Wirt er des stichs gewar | vnd felt dir auch in das swert | So würf dein swert ÿm für die fuess | vnd nach jm oder begreif ÿm den selbigen arm~ | vnd prich ÿm den -

Ein anders

Auch magstu aus der oberñ hu°t mit dem klös des swertz im zw dem haubt

87 v

schlahen | oder auf die arm~püg der vor gesatzten hant | oder in die knÿepüg des vorderñ fuess | vnd wil er dir das werñ | wenn dw In schlechst nach der knÿepüg | vnd wil dich oben überlauffen | So vorsetz ÿm den schlack mit dem gehültz | vnd setz im den ort in sein gesicht -

Item was man mit dem knopf schlecht | das haissen die donersleg dw magst in auch vnder die augen | in das visir do mit slachen

Item merck einen aus dem krais zu° füren an seinen danck | So greif nach eine~ vinger zw° der lincken | vnd prich über sich | Oder stich in oben in den hantschuech in die hant | vnd heb daz swert mit der hant vbersich | vnd für In aus dem kraiss | wisse das ist gut | vnd auch verporgen -

Item wildu einen man werfen der dir hat angesetzt | So übergreif mit der lincken vber sein lincke | vnd nÿm das gewicht peÿ seinen lincken elpogen das ist gut -

Also prich das

Wenn er durch greiffen wil | So prich ÿm die hant vorñ peÿ dem gelied mit deine~ swert -

Das ist die ander hu°t In harnasch zu° kampf

Nÿm das swert in paide hend | vnd haldes vber dein knÿe | vnd gee zu dem mann | Sticht er dir denn vnden zu° so wer ÿm nicht sunder leg ÿm an sein gesicht | Oder

88 r

Sticht er dir oben zu° es sei zu° den gesicht oder wo es ist | So setz ÿm den stich ab mit dem voderñ tail deines swertz | vnd setz ÿm an in das gesicht | oder an die drossel | vnd schlach dein swert vnder dein vchsen | vnd dring für dich | Oder setz ab zwischen deinen zwaien henden | vnd var mit dem knopf vmb sein hals | vnd vor setz ÿm mit deine~ rechten fuess | vnd fell In also -

Ein pruch wider das

Nÿm des arm~s war | vnd raid vmb vnd treib den arm~ pruch | Iten wenn du vor setzt so var vber mit der hanthab vber sein vor gesatztew hanthab | vnd zeuch zu° dir | vnd prich | vnd setz an | Oder wechsel durch | vnd setz ab mit dem klos Also prich das Nÿm des klosses war mit der lincken hant | vnd stos jm das swert hinder ruck | vnd stich | vnden zu° den hoden -

Das ist die dritt hu°t zu° kampf In harnasch

Nÿm das swertin paide hend | vnd stee in dein geheng peÿ der rechten seittñ also das der linck fues vor stee | vnd wenn Jenär auf dich sticht | oder wil slachen mit dem klos | oder wil dir an setzen | so stich ÿm zu° seiner vorgesatzten hant -

Ein anders

Oder stich vber seiner hant durch | vnd vber sein swert | vnd druck den knopf zw der erden | vnd setz an -

Aber ein anders

88 v

Oder slach jm zu° mit dem knopf zu° dem vorgesatzten elpogen | oder vnden zw° dem elpogen | vnd das swert wider gefast peÿ der klingen | vnd vnder das recht vchsen oder auf das knÿe

Item felt er dir in das swert in der mitt das geschicht gerñ von zagkeit so zewmnis rasch aus

Item felt er dir in die spitz so heb das swert vber das haubt | vnd nÿm das swert in paide hende | vnd ruck an dich vnd slach ÿm zw° der voderñ hant die er helt vor gesetzt | oder zu° der knÿepüg | vnd begreif wider das swert mit der klingen | vnd gelegt auf das knÿe -

Das ist die vierd hu°t zu kampf In harnasch

Nÿm das swert vnder das recht üchsen | vnd gee an den mann mit an setzen | vnd setz ÿm an an das gesicht | Wert ers so zuck oder setz jm an die drossel oder an die achsel | oder under die vchsen vnd dring in also von dir hin | vnd wenn du hast an gesatzt so lass in nicht ab komen | vnd wil er denn nn zu° dir mit slegen | vnd mit dem knopf arbaitten so volg jm nach mit nach raisen | und lass In nicht ab kömen so mag er weder geschlahen noch gestechñ | wenn er wirt ÿm zu° kurtz das ist die kunst das wisse -

Von an setzen

Merck alles das du wilt an setzen das

89 r

setz an | an das gesicht oder an die drossel oder and die linck achsel | oder vnder die vchsen | vnd dring in also -

Item merck eben setztu jm an an sein lincke seitten so tritt ab mit dem lincken fuess |

Oder setztu jm an an der rechten seitten so tritt ab mit dem rechten fuess | vnd lauf für dich | vnd druck In auf ein seitten | vnd lest er dir die seitten so stos in auf die hauben | wiße das ist das chranckist an dem menschen -

Item | merck | wenn du jm hast an gesetzt | uñ ist er lenger | wenn du so druck also geleich für dich hin ab das der ort vbersich auf gee | vnd jm wol in die ring gesatzt seÿ

Item ist er kurtzer wenn dw so lass dein swert mit der hant absincken untz auf die recht hüf | vnd als vor vber sich auf mit dem ort | vnd vntter die ring wol gesatzt als vor | vnd lass In nicht ab chöm~en | wil er denn mit dem kloss arbaitten so merck das nachvolgen mit dem ort so kan er zu° kainen dingen kumen das ist zu° merckñ | vnd ist gu°t -

Merck wider die ansetzen in das gesicht oder wo das seÿ das prich also

Stich ÿm vnden in die hant die er hat für gesetzt auf der klingen | vnd für in also aus dem kraiss

Item oder stich In über sein vorgesatztew

89 v

hant | vnd druck das swert mit dem knopf nider zu° der erden | vnd setz ÿm an -

Item oder setz ÿm ab zwischen deine~ zwaien henden | vnd mit dem knopf gestossen fur den hals | vnd vnden mit dem rechten pain getretñ hinder sein lincks | vnd dar über geworffen -

Item oder setz ÿm ab mit dem ort | vnd ÿm angesetzt an sein gesicht | Oder wechsel durch mit dem knopf | vnd setz da mit ab Item ob er die hant hat vmb gewant auf der klingen so stich in oben in die finger | vnd heb vber sich auf -

Item aber ein pruch wider das an setzen stich ÿm vnden durch sein hant | vnd vber sein swert | vñ er pür den knopf vber sein lincke hant vñ ruck do mit nider | vñ setz an

Item | wenn dir einer wil mit dem knopf vmb den hals varñ vber dein rechte achsel | So begreif im den elpogen mit der lincken hant | vnd stos in von dir | vnd stich mit der lin rechtñ hant krefftiglich -

Item oder begreif mit der rechten hant sein rechte | vnd mit der lincken nÿm im das gewicht peÿ seinem elpogen -

Item ruck in zw dir mit seiner rechten hant | vnd begreif ÿm den leip vnd gewinn ÿm die seitt an | vnd erheb ÿm | vnd slach ÿm vnden aus den fues so felt er das ist auch gut

90 r

Item wenn er sticht so stich mit ÿm geleich ein zu° seiner lincken seitten | vnd begreif sein swert zw deine~ swert mit deiner lincken hant | vnd mit der rechten hant wind vnden durch sein swert | vnd slach In denn mit paiden swerten -

Item | wenn dir einer hat an gesetzt | vnd dw jm auch das prich also nahen ÿm als mit eine~ dringen mit der seitten an die er dir hat gesetzt | vnd greif mit deiner lincken hant vorñ an sein swert peÿ dem ort | vnd vrbering ruck in nach dir so gewingstu ÿm die seitt an -

Item stichstu eine~ zu° aus der oberñ hu°t zw° seine~ gesicht felt er dir denn mit seiner lincken hant in dein swert für dein lincken | So vall mit deine~ knopf vnder dein rechts vchsen in die hu°t | vnd setz ÿm an vnder sein lincks üchsen | oder an die prust -

Item stichstu eine~ zu° dem gesicht aus der vnderñ hu°t | felt er dir denn in dein swert mit seiner lincken hant für deiner lincken so var auf mit der rechten hant in die ober hu°t | vnd heng ÿm den ort vber sein lincke hant | vnd setz jm an -

Item wisse das alle ober~ auf an setzen prechen | vnd ledigen die underñ | vnd in allen an setzen | So wind deinen knop vnder dein rechts vchsen in die hu°t | vnd dring also fur dich mit sterck -

90 v

Item stichstu eine~ zu° dem gesicht aus der oberñ hu°t felt er dir den mit seiner lincken hant in dein swert zwischen deinen paiden henden so wind mit dem Knopf inwendich durch sein arm~ oder aussen vber sein arm~ auf dein lincke seitten | vnd ruck auf dein rechte seitten | vnd setz im an das haist ausgeze[..]nt vnden | vnd oben -

Item | wenn du eine~ hast an gesetzt | vnd er starck wider ist das dw nicht gedringen magst greift er denn vnden durch dein swert mit seiner lincken hant | vnd begreift dir dein lincke | vnd wil dir das gewicht nemen | So merck die weil er dir den arm~ vmb reÿdet so setz ÿm an vnder das linck vchsen | so gewinstu im die swech an wie starck er ist kan im die sterck nicht gehelfen

Item stich mit eine~ geleich ein aus der vnderñ hu°t | vnd pis startck so far am swert ist er auch starck so far mit dem knopf auf mit deiner rechten hant | vnd mit der lincken leit im den ort vber sein lincken arm~ vor die prust oder vnder sein lincke vchsen | vnd setz ÿm an | vnd in allen ansetzen so wind das gepindt vnder das vchsen in die hu°t -

Hie hebt sich an maister marteins hundtfeltz kunst die vnder halden vnd die auf sten im harnasch zu° kampf

91 r

Merck wenn er felt so fall im albeÿ zu° der rechten seitten | vnd mit dem rechten knÿe fall zwischen sein pain | vnd mit der lincken hant fal fur seinen hals | vnd pis nicht zu Jach das du nicht zu ser vber in fellest | vñ greif nach seine~ degen | vnd zeuch denn deine~ nicht du habst in den~ gewis | wil er dir denn in den degen fallen so stich in zu° der hant -

Ein anders halden

Nÿm sein rechten arm~ zwischen deine pein | vnd leg dich auf in tzw twerchs uñ streck dich vast und halt deine pain fest zu° samen | vnd greif mit der lincken hant in sein linkcken arm~ | vnd hald in also | vnd arbait mit der rechten hant mit dein degen das get zu° paiden seittñ -

Aber ein halden

Wenn du neben in fellest so nÿm sein haubt vnder dein lincks uchsen | vnd vmb vach in mit dem hals | vnd leg dich mit dem leib oben uber sein antlitz | vnd arbait mit der rechten hant - Aber ein halden

Felt er auf den ruck so fall im mit deine~ rechten knÿ zwischen sein pain | vnd vas im den rechten arm in dein lincke knÿepüg | vnd sitz dar auf | vnd begreif sein lincke hant mit deiner rechten | vnd ruck im die under seinen hals | vnd haldt in fest mit der lincken hant | vnd arbait mit

91 v

der rechten mit dem degen -

Aber ein hald

Wirfstu In auf den ruck so vall mit deine~ lincken knÿe in sein rechten arm | vnd mit der lincken für sein hals | vnd do mit druck in fast | vnd begreif ÿm sein lincke hant mit der rechten | vnd greif mit der lincken der rechten zu° hilff | vnd hald ÿm sein lincke hant mit deiner lincken | vnd arbait mit dem degen mit der rechten -

ein anders halden

Felt er auf den ruck so begreif im paide pain vnder den knÿen mit paiden henden | vnd heb sÿ auf vnd fall im mit dem knÿe zwischen seine pain auf die hoden | vnd hald im also paide pain mit einer hant | vnd alsbalt mit der anderñ mit dem degen

Aber ein halden

Item peÿ dem hals mit der lincken vber die kel | Item vnder dem rechten arm~ durch vnd vber dem hals -

Würfstu in auf den pauch

So vall du mit ÿm dem rechten knÿ hinden in das schlos vnd mit der lincken hant greif über sein haubt vorñ an das visir | vnd zeuch vbersich | vnd mit dem knÿe druck nÿder | Ist sein visir offen so greif mit den vingern in seine augen | oder greif mit paiden henden an die hauben | vnd verdre im den hals so felt er wider auf den pauch Ein arm~ pruch

92 r

Item felt er auf den pauch so fall mit eine~ knÿe auf sein arm~ im gelenck | vnd prich vbersich | Item wenn er auf dem pauch leit so sitz auf im vnd schreit vber sein arm~ | vnd prich ÿm sÿ | Item sitz ÿm auf sein achsel schritling | vnd zeuch ÿm den kopf vber sich

Item sein rechte hant auf dein ruck wol vber sich gedaucht | Item greift er dir in dein visir mit den vingerñ wenn es offen ist von vnden auf | wenn du auf dem pauch leist so schlach mit deiner lincken hant an sein lincke | oder mit der rechten auf sein rechte | vnd ruck an dich | vnd druck dein haubt zu° der erden | vnd hilf mit henden vnd mit fuessen so kumpstu auf -

Aber ein pruch

Item begreif sein lincke hant mit deiner lincken | vnd zuck an dich fall auf den ruck vnd mit der rechten hant begreif sein pain vnd heb vbersich so kumpstu auf -

Ob du auf den ruck felst

Item ob dich einer auf den ruck wirft so merck in dem als du fellest so leg dein lincke hant auf dein prust | vnd wenn er auf dich felt so begreif mit deiner lincken hant seinen lincken elpogen | vñ mit deiner rechten hant greif vnder sein lincks knÿ vñ heb vbersich | vnd mit dem leib schupff dich rasch auf in dem fäl so chumpstu auf ÿn.

Ein ander pruch

92 v

Oder pring deinn lincken arm~ vmb sein hals | vnd heb mit dem rechten pain | vnd hilf mit der rechten hant

Item magstu das nicht getu°n | vnd er mit dem degen arbait so schupf dich albeg auf wertz magstu dein lincke hant nicht gewinnen so greif ÿm vnder sein hand vnder den degen | vnd tu° die hant zu° wenn du greiffen wild | vnd weñ du jm die hant gefast hast so greiff mit der rechten an sein lincken elpogen | vnd heb vbersich zuck das recht knÿ zu° dir | vnd besich ob du jm magst von dir gestossen -

Ein gut halden in den ringen

Begreif mit der rechten hant sein rechtñ arm hinder seiner rechten hant | vnd mit deiner lincken hant nÿm ÿm das gewicht pei seiner~ rechten elpogen | vnd stos sein rechten arm~ mit deinder rechten hant wol vber deinen lincken arm~ vnd dritt hinder in | vnd hald in also fest hastu In nicht geworfen so begreif sein rechts pain vnder dem knÿe -

Das ist ein lere

Hastu einen vnder dich geworffen so schneit oder reis ein gross stuck aus seine~ wappenrock stich ÿm das in sein visir mit dem degen | vñ lass in das nicht aus gewinnen das ist gut weñ es kotig ist | oder würf im das visir voller staubs | oder gemüls oder sich mit dem degen erden aus vnd wirf ims in das gesicht ein andere ler

93 r

Merck magstu kein plöss an ÿm gesehen so schneid ÿm aus dem wappenroch auf den armen | oder die hosen | vnd was dw stichst von nesteln die schneid auf vnd vindestu ein gurtel die schneid auch auf fo vindestu etwas an das dir gut wirt | vnd stich gar eben auf seinen degen - Merck du magst In auch slahen mit dem knopf | oder stossen zu° dem hertzen | weñ er leit oder zu° den achselñ oder zu° den anderñ gelencken | Merck in dem verreiben slach oben oder vnden an sein enckel | vnd zeuch oben auf sein seittñ mit der rechten - Also stich auch die plössen hinden zw dem leib zu° dem gesicht zwischen den schulterñ inwendig vnder den vchsen | vnd zuck nicht wider pis er sichert -